Partidjamentu TV
welcome to partidjamentu

Toma-Tróga

Kel sekison li e pa partidja pikénus sklarisimentu o informason sobri nos kultura populár i nos língua matérnu. Purtántu, pode atxádu, disponibilizádu, diskutidu o rifletidu li kontribusons divérsu, prinsipalmenti sobri skrita di nos língua i spresons di/sobri kultura populár káuberdiánu.

Tanbê nes sekison ta dádu spásu pa diskontrason o divirtimentu. Di ki manera? Através di konta-pasáji, konta-párti, stória (real o inventádu) i anedóta.


RUDIMENTUS SOBRI ALFABÉTU KÁUBERDIÁNU I SKRITA KU ES ALFABÉTU

1 - LÍNGUA KÁUBERDIÁNU (aspétu stóriku):

1.1- Kontribuson di línguas na si formason (línguas oropeu/línguas afrikánu)

1.2- Papiádu: désdi kándu? Entri un séklu i un séklu i meiu, dipos di povuamentu (cfr. António Carreira, Cabo Verde: formação e extinção de uma sociedade escravocrata (1460-1878) e idem, O crioulo de Cabo Verde: surto e expansão).

1.3- Skrebedu: désdi kándu? Apartir di últimu kuártu di séklu 19 (Adolfo Coelho, «Os dialectos românicos ou neolatinos da África, Ásia e América»; Joaquim Vieira Botelho i Custódio José Duarte, «O crioulo de Cabo Verde, breves estudos sobre o crioulo das ilhas de Cabo Verde»).

2 - ALFABÉTU: konjuntu di létra ki konvensionádu skrebe un língua ku el.

2.1- Etimulójiku (purtuges): a b c ç d e f g h i j k l m n o p q r s t u v w x y z.

2.1.1- Sigidoris

2.1.1.1- Na séklu 19: filólugu purtuges Adolfo Coelho (pioneru) ku si nsaiu, «Os dialectos românicos ou neolatinos da África, Ásia e América» (1880), ku skrita di bázi etimulójiku. El ten algun sigidor (na séklu 19 – Joaquim Vieira Botelho i Custódio José Duarte publika, na 1885, «O crioulo de Cabo Verde, breves estudos sobre o crioulo das ilhas de Cabo Verde».

2.1.1.2- Na séklu 20: Cónego Teixeira (ku si purmeru tentativa di kartidja na kiriolu), Eugénio Tavares, Pedro Cardoso, Napoleão Fernandes i otus.

2.2- Fonétiku-fonolóliku (pa kada létra un son i pa kada son un létra o un raprizentason).

2.2.1- Na séklu 19: a b ch d e f g i jh j k l m nh n o p r rr s t u v x z.

NB: Propodu pa António de Paula Brito (purtuges, más rizidenti na Káuberdi), na si nsaiu, «Apontamentos para a gramática do crioulo que se fala na ilha de Santiago de Cabo Verde» (1885), ku skrita di bázi fonolójiku. Len di si própi otor, el ka ten sigidor.

2.2.2- Na séklu 20

2.2.2.1- Di Mindélu (1979): a b ĉ d e f g i Ĵ k l Ȋ m n n̂ n̈ o p r s ŝ t u v z ẑ.

2.2.2.2- ALUPEK (1998): a b d dj e f g h i j k l lh m n nh n̈ o p r s t tx u v x z (23 létra i 4 dígrafu).

2.2.2.3- ALUPEK midjorádu (2008): a b d e f g h i j k l m n ñ o p r s t u v x z dj lh nh tx (23 létra i 4 dígrafu).

NB: Sinal di nazalason: létra “n” i til (~).

Izersisi di aplikason

Andexu, baskudja, djobe, kása, káza, djongo, djondjo, bizita, barexa pobréza, rikéza, largéza, baxóti, kubisós, piskós, karos, djangrabi, fixon, katxupa, ñarñari, nóra, nheme, ilha, ñanhóma, farónpa, kebe, informa, kapri, txuba, ngori, fonfon, karkixa, lenbe, konpo, disidi, bazófu, duspi, dretu tórtu, bêntia, pêntia, kontínua, oronbo, djagasi, djagasida, trotxida, xeren, tenteren, birbidjáka, djádji-djádji, txintxiróti, sankaitánu, Djantebi, lakakan, fidjós, loron, mángi, brinjéla, bagás, rapás, profesor, Gomisiánu, lobuzómi, djardjari, djardjaridu, raparigentu, kunbósa.

3 - ARTIGU

3.1- Difinidu: ka ten (na si lugár ta o pode uzádu prunómi dimostrativu “kel” o “kes”)

3.2- Indifinidu

3.2.1- Singulár: un (ki albes pode konfundidu ku numeral kardinal (1), skrebedu pur-stensu)

3.2.2- Plural: uns

4 - SUBUSTANTIVU (konkordánsa: jéniru i nunbru)

4.1- Jéniru: na káuberdiánu, más di ki jéniru di subustantivu, ta sér midjór pâpia di sékisu (pa animal i algen): ómi, mudjer; boi, báka; gálu, galinha; fidju-mátxu, fidju-fémia.

NB: Entritántu, pa fórti influénsa di purtuges i pa iperkureson, dja sa ta adulterádu pa: fidju, fidja, ets.

4.2- Nunbru

4.2.1- Na plural, albes subustantivu ki ta finda na vugal pode toma un “s” (ómi/ómis).

4.2.2- Kes ki, na singulár, ta tirmina na “l”, na plural es pode perde kel “l” ki ta subustituidu pa “s”, ku lijeru alterason (o nau) na kel vugal final (papel/papés, pastel/pastés).

4.2.3- Kes ki, na singulár, ta tirmina na “r” i na “s”, na plural es pode kirsentádu “is” (profesor/profesoris, mudjer/mudjeris, fidjós/fidjósis, purtuges/purtugesis).

NB: Entritántu, debe sklarisedu dos kusa: 1) Óra ki un subustantivu sta dipos di un kontitativu o di un palábra ki ta ideia di kontidádi, el ta mante na singulár, dja ki ideia di plural pode sta subentendedu na kel kontitativu: dos ómi, txeu mudjer, bastánti mininu. 2) Óra ki un subustantivu sta kunpanhádu di un adijetivu, si un des sta na plural, kelotu dja ka meste márka di plural: ómis bon, mudjeris bunitu.

5 - ADIJETIVU (konkordánsa): régra jeral, pode fládu ma adijetivu ta mante neutru, tántu na nunbru, sima na jéniru. Istué, tántu es pode fika senpri na singulár, sima es debe mante neutralidádi na jéniru. Entritántu, pa nunbru, dja pontádu algun konportamentu ki el pode ten, i, na jéniru, sértamenti pa influénsa di purtuges i pa iperkureson, dja el sa ta fasedu fimininu: kása bunita.

6 - ASENTUASON

6.1- Na káuberdiánu, nomiádamenti na variadádi di Santiágu, maiór párti di palábra (ku más di un sílaba) ten asentu tóniku na pinúltimu sílaba. Purtántu, es e grávi. Purisu, na maiór párti di palábra ka meste podu asentu gráfiku (pa indika sílaba tóniku), pamódi kel privizibilidádidi la.

6.2- Entritántu, pa djuda más na letura, konsiderándu ki dja konstatádu ma ten (di pontu di vista sonoru) “a” abértu i “a” fitxádu, “e” abértu i “e” fitxádu, “o” abértu i “o” fitxádu; konsiderándu tanbê ma ten palábras ku dos o más sílaba ki albes ten asentu tóniku na últimu sílaba o anton na antipenúltimu sílaba, i sabendu ma ten alguns asentu gráfiku pa indika, un óra grau di abertura di vugal, otu óra sílaba tóniku, otu óra kel tudu dos situason li, i otu óra inda otus trásu ki debe ruspetádu na letura, anton ta sklarisedu ma:

6.2.1- Asentus gráfiku, na káuberdiánu, ten: gudu (´), sirkunflékisu (^) i til (~), sendu gudu pa indika vugal abértu, sirkunflékisu pa vugal fitxádu, til pa un sértu nazalason o, óra ki el podu riba di “n”, pa sinaliza un son konsuántiku spesial.

NB: Normalmenti, nazalason di kalkér palábra ta fasedu ku létra “n”. Til, so na kes kázu (kuázi senpri di iperkureson) undi (na purtuges) nu ten ditongu nazal (“ão” i “ãe”, ki ta bira “ãu” i “ãi”, ruspetivamenti).

6.2.2- Tudu “a”, ku “e” i ku “o” abértu, debe leba asentu gudu, na kalkér sirkunstánsa o situason ki es parse: báka, kabálu, káuberdiánu; kabésa, bodéku, pé; bisós, dondóka, grós. Óra ki es ka e abértu, es ka meste asentu: kalman, balai, piran; kapaseti, bilheti, pulsera; bolu, boli, bandoba.

6.2.3- Tudu palábra ku un sílaba so, tirminádu na “a”, “e” o “o” abértu (sigidu o nau di otu létra ki pode sér vugal o konsuánti), debe leba asentu gudu na kel vugal la: pá, káu, xá; pé, lé, fé; pó, fós, sól. Óras ki es ka e abértu, es ka meste ninhun asentu: po (vérbu), se (adijetivu variánti di “si”), so.

6.2.4- Tudu palábra ku asentu tóniku na antipinúltimu o ántis di antipinúltimu sílaba debe leba asentu gráfiku na vugal di sílaba tóniku, konfórmi si naturéza di abertura (ki pode sér abértu o fitxádu): prátiku, kápusula, tékinu, tékiniku, sílaba, sólidu, últimu.

6.2.5- Tudu palábra tirminádu na konsuánti “l”, “n”, “r” i “s” (más ki ka “s” márka di plural) ten asentu tóniku na últimu sílaba i (régra jeral) es ka ta leba asentu gráfiku: Purtugal, portal, papel, pastel, kalman, xeren, binten, rispondon, korason, profesor, kubertor, karos. Más, óra ki ses vugal di últimu sílaba e abértu, el ta leba asentu (gráfiku) gudu (ki, len di konfirma sílaba tóniku, el ta indika si naturéza vukáliku): padás, patrás, derés, merés, bisós, kubisós.

6.2.6- Pa palábras tirminádu na ditongu, régras di asentuason pode sér kes ki ta sigi:

6.2.6.1- Tudu palábra tirminádu na ditongu “ai”, “ei”, “oi”, “ui” ten asentu tóniku na últimu sílaba. Purtántu, es ka meste asentu gráfiku (anonser asentu gudu, óra ki vugal asentuádu e abértu): papai, balei, molói, konklui.

6.2.6.2- Palábras tirminádu na ditongu “ia” i “ua” (na variadádi di Santiágu) ten, normalmenti, un di kel dos konportamentu siginti:

6.2.6.2.1- O es e gudu i, purisu, es pode leba asentu gráfiku (sirkunflékisu, pamódi poku abertura di kel a) na últimu létra di sílaba final, pa ivita ki ditongu fika disfetu: pabiâ, diâ, diariâ, sabedoriâ, fregeziâ; ruâ, kuâ, raskuâ, pesuâ, Lisbuâ, Ganbuâ.

6.2.6.2.2- O es e grávi i, purisu, es debe leba asentu gráfiku (di akordu ku naturéza di abertura) na vugal tónikamenti asentuádu: azágua, Páskua, kontínua, pôntua, pâpia, bêntia, pêntia, inísia, límia.

6.2.6.3- Palábras tirminádu na ditongu “iu” (na variadádi di Santiágu) ten, normalmenti, un di kel dos konportamentu siginti:

6.2.6.3.1- O es e gudu i, nes kázu, es ka meste ninhun asentu gráfiku: briu, friu, riu, sonbriu, dabiu, pabiu, pixiu.

6.2.6.3.2- O es e grávi i, nes kázu, es debe leba asentu gráfiku na pinúltimu sílaba, pa ivita iventual tentason di disfase ditongu: inísiu, prinsípiu.

7 - PRUNÓMI PESUAL

7.1- Di sujetu

7.1.1- Singulár: N, bu, el (di raforsu: amí, mi; abô, bo; ael): N bai, bu bai, el bai.

NB: Singulár di prunómi pesual di sujetu di purmeru pesuâ ta raraprizentádu senpri ku N (grándi).

7.1.2- Plural: nu, nhos, es (di raforsu: anos, anhos, aes): nu bai, nhos bai, es bai.

7.2- Di konplimentu

7.2.1- Singulár: -m, -bu, -l (na sértus situason: -mi, -bo, -el): el da-m, el dá-bu, el da-l (el dába-mi, el dába-bo, el dába-el).

7.2.2- Plural: -nu, -nhos, -s (na sértus situason: -nos, -nhos, -es): el dá-nu, el da-nhos, el dá-s (el dába-nos, el dába-nhos, el dába-es).

8 - PRUNÓMI (O ADIJETIVU) POSISIVU: nha / di-meu, bu / di-bo, si (se) /di-sel; nos / di-nos, nhos / di-nhos, ses / di-ses: nha kása / kása di-meu, bu kása / kása di-bo, si (se) kása / kása di-sel; - Kel kása la e di kenha? – E di-meu, di-bo, di-sel; di-nos, di-nhos, di-ses.

9 - PRUNÓMI (O ADIJETIVU) DIMONSTRATIVU: es (sing./pl.), kel, akel (singulár), kes, akes (plural), kelotu, omesmu: e es; kel ben, kes ka ben; kel ómi, kes mudjer; kelotu kasa, omesmu algen.

10 - PRUNÓMI RILATIVU: ki, ken ki (lokuson prunominal), kenha ki (lokuson prunominal): ómi ki bai, ken ki ben, kenha ki fika.

11 - PRUNÓMI INTIRUGATIVU: ken, kenha, kál, kántu.

12 - PRUNÓMI INDIFINIDU: algun (ki, na plural, ta bira “alguns”), ninhun, algen, ningen, otu (ki ta bira “otus”, na plural), tudu, kalkér, txeu, mutu, poku, más, menu (mênus): algun ál ben; ninhun ka ben; ningen ka bai; otu ál ben; tudu ka sér; kalkér pode bai; txeu ta ben; ka mutu ki ben; poku ben; más ka ben; bai mênus.

13 - VÉRBU: len di vérbu “ser” (“e”: es fórma verbal ka ta leba asentu gráfiku; “éra”) i “ten”, ta atxádu (na kiriolu di Santiágu) más 5 tipu di vérbu: di tema na “a” (áma), na “e” (bende), na “i” (xinti), na “o” (konpo) i na “u” (bonbu).

NB: Na kiriolu papiádu na Santiágu, pode konfundidu (na sértus situason) vérbu di tema na “e” ku vérbu di tema na “i”, sima tanbê pode konfundidu kel di tema na “o” ku kel di tema na “u”, dja ki (txeu bes) kel “e” pode prununsiádu “i” i kel “o” pode prununsiádu “u”. Pa tendu sertéza di ki tema stádu diánti del, debe konjugádu (kel vérbu ki kredu skrebe) na pritértu inpurfetu, o anton po-l na partisipi pasádu: bende (“bendeba” o “bendedu”), xinti (“xintiba” o “xintidu”); konpo (“konpoba” o “konpodu), bonbu (“bonbuba” o “bonbudu”).

Izersisi di aplikason

1) Kánta, barádja, râkua; 2) djenge, padise, konxe; 3) konsinti, djangrabi, djagasi; 4) konpo, djondjo, djongo; 5) djanbu, lanbu, bonbu.

14 - ADIVÉRBI

14.1- Di lugár: li, la, dentu, fóra, pértu, lonji, riba, báxu, diánti, trás, undi, pundi, nundi.

14.2- Di tenpu: oxi, onti, manhan, inda, ántis, gósi, dja, sédu, lógu, tárdi, dipos, senpri, nunka, atualmenti, antigamenti, kándu, óki, kelóki, óra ki (lokuson adiverbial).

14.3- Di módi: sima, módi, ben, mal, dretu, tórtu, si, diprésa, divagár, kurétamenti, lindamenti, sinplismenti.

14.4- Di afirmason: sin, sértu, sértamenti.

14.5- Di negason: nau, ka, nen, nunka, djamás, tanpoku.

14.6- Di dúvida: talbes, sikadjár.

14.7- Di skluzon: so, somenti, sinon, apéna.

14.8- Di inkluzon: ti (te, até), tanbê (tánbi), inda, mesmu, inkuzivi.

14.9- Di kontidádi: txeu, poku, mutu, más, menu (mênus), bastánti, náda.

15 - PRIPOZISON: di, na, pa, ti (te, até), ku, sen, kóntra, peránti, entri, désdi, tiránti.

16 - KONJUNSON

16.1- Kordenativu

16.1.1- Kopulativu: i, tanbê (tánbi), nen.

16.1.2- Disjuntivu: o.

16.1.3- Adiversativu: más, kontudu, entritántu.

16.1.4- Konkluzivu: purtántu, purkonsiginti, konsakuentimenti, lógu.

16.2- Subordinativu

16.2.1- Intigránti: ma, ki.

16.2.2- si, kázu.

16.2.3- Kauzal: pamódi, purki.

13.2.4- Final: ki.

16.2.5- Tenpural: kándu, inkuántu.

16.2.6- Konsesivu: enbóra, si.

16.2.7- Konsikutivu: ki.

16.2.8- Konparativu: sima, konfórmi.

17 - INTIRJESON: a!..., ái!..., ái-ái!..., axá!..., ávé!..., bé!..., bé-bé!..., bi!..., ixí!..., oi!..., oi-oi!..., pisiu!..., pixiu!..., ufú!..., ui!...

Praia, 22.04.09

(rivistu i omentádu: 29.11.2017)

T.V. da Silva

Obs.:

1) Kel testu li skrebedu na abril di 2009. N fase-l gósi algun atualizason, sobrutudu na asentuason gráfiku, sima prupodu na (2014) Alfabétu Káuberdiánu: un prupósta di skrita ku stória voltádu pa futuru, di T.V. da Silva (kfr.);

2) Kel referénsa sobri alfabétu etimulókiku (kfr. pontu 2.1., debe sklarisedu ma e so pa kumodidádi i pa un sértu (mau)ábitu (ki, jeralmenti, ka ta splikádu) ki el fládu, dja ki tudu alfabétu e, isensialmenti, funétiku (pa si própi naturéza.